Иницијативата на европските продуценти (EPI – European Producers Initiative) ќе ја организира првата работилница „IP Development for Creative Professionals“ од 17 до 19 септември 2026 година во Берлин, Германија.
Обуката е посветена на развојот и вреднувањето на интелектуалната сопственост во креативниот сектор.
Во текот на тридневната програма, учесниците ќе имаат можност да стекнат практични знаења за тоа како креативните идеи да се претворат во интелектуална сопственост со пазарен потенцијал, преку стратегии за развој, заштита, комерцијализација и проширување на различни платформи и за различна публика.
Обуката е наменета за креативни професионалци кои сакаат да развиваат проекти со долгорочна вредност, вклучувајќи сценаристи, продуценти, креатори на видеоигри, професионалци од издавачкиот сектор, креативни тимови и други културни работници заинтересирани за создавање одржливи брендови и наративни универзуми.
Програмата опфаќа теми како: создавање минимално одржлив производ (Minimum Viable Product), привлекување публика, проширување на проекти кон телевизиски серии, филмови, видеоигри, книги и придружни производи, како и стратегии за трансмедијално раскажување (transmedia storytelling) и градење заедници околу содржините.
Еден од клучните сегменти на обуката ќе биде разбирањето на правната рамка поврзана со интелектуалната сопственост, вклучувајќи механизми за заштита, лиценцирање и управување со авторски права. На тој начин учесниците ќе можат подобро да ги контролираат своите проекти и да го зголемат нивниот комерцијален потенцијал.
Методологијата комбинира предавања и сесии водени од меѓународни експерти, практични вежби, анализа на студии на случај и тимска работа. Во текот на работилницата, учесниците постепено ќе развиваат сопствена стратегија за интелектуална сопственост и ќе ги применуваат стекнатите знаења во реален контекст.
Обуката ќе ја координира Нуно Бернардо (Nuno Bernardo), продуцент и генерален директор на „beActive Entertainment“, а ќе учествуваат експерти од областа на аудиовизуелниот сектор, видеоигрите, маркетингот, лиценцирањето и издаваштвото.
Според организаторите, една од главните карактеристики на програмата е соработката меѓу професионалци од различни креативни сектори, со цел размена на искуства и решенија поврзани со привлекување публика, интернационализација и користење содржини преку повеќе платформи.
Обуката IP Development for Creative Professionals е поддржана во рамките на програмата „Креативна Европа – МЕДИА“, преку линијата Skills and Talents Development, чија цел е да го поддржи развојот на вештини и професионална обука за работници во аудиовизуелниот сектор. Во рамките на овие активности се достапни делумни стипендии за професионалци од земјите квалификувани за учество во „Креативна Европа – МЕДИА“ .
Повеќе информации за пријавување и за учество на обуката може да добиете на веб- страницата на EPI:
https://www.epi.media/en_GB/programm/ip-development-for-creative-professionals-48/register
Дополнително, повеќе информации за обуката може да добиете на информативната онлајн сесија закажана за 18 август 2026 година во 15 часот.