Како може културното наследство да придонесе за создавање поотпорни, поинклузивни и подемократски општества? На ова прашање се обидува да одговори новата серија видеопредавања од образовниот курс European Heritage Masterclass, иницијатива на организацијата „Европа Ностра“, која нуди 12 тематски лекции посветени на различни аспекти на културното наследство и неговата улога во современото општество.
Серијата е реализирана во рамките на проектот Europa Nostra Heritage Agora, кофинансиран од програмата „Креативна Европа“, а предавањата ги води археологот Херман Парцингер (Hermann Parzinger), претседател на „Европа Ностра“ и еден од водечките европски експерти во областа на културното наследство.
Преку 12 епизоди, овој образовен курс го претставува наследството не само како начин на зачувување на минатото, туку и како активен ресурс за развој на заедниците и општествата. Темите опфаќаат прашања поврзани со идентитетот, етиката, сопственоста, учеството на граѓаните, климатските промени, дигиталната трансформација, управувањето со наследството и неговата иднина.
Предавањата се снимени во историската зграда Huis van Brienen во Амстердам, објект кој е заштитен и одржуван од организацијата Hendrick de Keyser Monumenten.
Првата лекција, со наслов „Зошто е важно наследството?“ (Why Heritage Matters?), веќе е достапна и го отвора централното прашање на целата серија: како може културното наследство да придонесе за зајакнување на чувството на припадност, историската свест, граѓанската одговорност и демократските вредности.
Курсот е наменет за поширок круг професионалци од областа на културата и наследството, истражувачи, студенти, но и за сите заинтересирани за подобро разбирање на значењето на европското културно наследство и неговата улога во одговорот на современите предизвици.
Овој бесплатен образовен курс овозможува пристап до знаења и искуства од водечки европски експерти во областа на културното наследство.
Повеќе информации и пристап до курсот може да најдете тука