Отворен е повикот за учество во „EAVE Producers Workshop 2027“, едногодишна европска програма за професионален развој на продуценти од областа на играниот филм, документарниот филм и телевизиските серии.
Програмата ја организира EAVE – European Audiovisual Entrepreneurs, една од водечките европски организации за обука и развој на продуценти, а е поддржана од програмата „Креативна Европа – MЕДИА“.
Програмата е наменета за продуценти кои веќе се активни во филмската и во телевизиската индустрија и кои сакаат да го зајакнат своето меѓународно искуство, да ги унапредат знаењата за европска и за меѓународна копродукција и да изградат нови професионални контакти.
Повикот е отворен и за професионалци од сродни области на аудиовизуелниот сектор, вклучувајќи експерти од областа на финансирање, правни услуги, филмски фестивали и пазари, како и други сегменти поврзани со продукцијата.
Секоја година се избираат 56 учесници од европски и од други земји, кои учествуваат во три интензивни еднонеделни работилници. Дел од учесниците работат со конкретен проект во развој, додека другите се фокусираат на развојот на своите продукциски компании и професионални кариери.
Во рамките на работилниците, учесниците работат со искусни продуценти и меѓународни експерти на теми поврзани со:
• развој и анализа на сценарија;
• развој на филмски и телевизиски проекти;
• финансирање на продукција;
• правни аспекти на европска копродукција;
• маркетинг и стратегии за претставување проекти;
• презентирање проекти (pitching) и подготовка за меѓународниот пазар.
Завршната работилница овозможува средби со околу 50 меѓународни професионалци („Future Partners“) – претставници на фондови, инвеститори, продажни агенти, фестивали, телевизии и други клучни чинители од европската аудиовизуелна индустрија. Ова претставува можност учесниците да ги претстават своите проекти, компании и професионални планови пред потенцијални партнери.
По завршувањето на програмата, учесниците стануваат дел од меѓународната мрежа на EAVE-алумни, која обединува активни продуценти од Европа и пошироко и овозможува понатамошно професионално поврзување и соработка.
Работилниците ќе се одржат во следните периоди:
• 5 – 12 март 2027 година – Луксембург;
• јуни 2027 година – локацијата и датумите дополнително ќе бидат објавени;
• октомври/ноември 2027 година – Хелсинки, Финска.
Интервјуата со кандидатите што се претходно селектирани ќе се одржат наесен, а конечната селекција ќе биде објавена во декември 2026 година.
Котизација и можности за стипендии
Учеството во програмата вклучува трошоци поврзани со реализацијата на работилниците и програмските активности. Заинтересираните кандидати треба да ги проверат деталните информации за условите и надоместоците за учество на официјалната веб-страница на EAVE.
За учесници од одредени земји, меѓу кои и Северна Македонија, постојат можности за стипендии и финансиска поддршка со цел олеснување на учеството во програмата.
Рок за аплицирање и начин на пријавување
Кандидатите може да аплицираат за учество во „EAVE Producers Workshop 2027“ најдоцна до 17 август 2026 година.
Апликацијата се поднесува преку онлајн формуларот достапен на официјалната веб-страница на EAVE – European Audiovisual Entrepreneurs.
По завршувањето на рокот, апликациите ќе бидат разгледани од комисија за селекција, а избраните кандидати ќе бидат контактирани во рамките на процесот на селекција.
Информации за условите за учество, апликацијата и за сите дополнителни детали се достапни на официјалната веб-страница на програмата „EAVE – European Audiovisual Entrepreneurs“:
https://eave.org/programmes/eave-producers-workshop-2027