WEMW 2027: Отворени повици за филмски проекти, продуценти и нови бизнис-модели
When East Meets West (WEMW) 2027 го започна новиот циклус на апликации за своите програми, кои нудат можности за развој на филмски проекти, меѓународна копродукција и дистрибуција, професионална едукација, развој на продукциски компании, како и поврзување на филмскиот сектор со индустријата на видеоигри.
По објавувањето на повикот за Co-Production Forum, сега се отворени апликациите и за пет дополнителни програми: Last Stop Trieste, This Is IT, EAVE Slate, Inspirational Labs и Films x Games Connection Hub.
Крајниот рок за аплицирање за овие пет програми е 30 октомври 2026 година, а кандидатите можат да поднесат проекти во повеќе од една секција, доколку ги исполнуваат условите.
Програмите се реализираат во партнерство со меѓународни филмски фестивали, филмски маркети и организации за професионална обука. WEMW дополнително соработува со повеќе од 30 филмски фондови, преку кои над 80 продуценти ќе можат да добијат посебни услови за покривање на дел од трошоците за учество.
Co-Production Forum
Co-Production Forum е наменет за проекти во развој со потенцијал за меѓународна копродукција. Во програмата можат да учествуваат долгометражни играни и документарни филмови, како и краткометражни анимирани филмови.
Форумот создава можност проектите да бидат претставени пред меѓународни продуценти, финансиери, филмски фондови, продажни агенти, дистрибутери и други професионалци од аудиовизуелниот сектор. Целта е да се воспостават нови партнерства, да се отворат можности за финансирање и да се поттикне понатамошниот развој и меѓународната циркулација на проектите.
Last Stop Trieste
Last Stop Trieste е секција „Works in Progress“, организирана во соработка со Trieste Film Festival, и е наменета за документарни филмови кои се во завршна фаза на монтажа.
Можат да се пријават проекти кои претходно биле развивани или презентирани во рамките на партнерските програми Ex-Oriente Film Workshop, BDC Discoveries, Docu Rough Cut Boutique, Baltic Sea Docs, ZagrebDox PRO и WEMW Co-Production Forum.
Избраните документарни филмови ќе имаат можност да конкурираат за Film Center Montenegro Award.
This Is IT
Програмата This Is IT се реализира во партнерство со Trieste Film Festival, со соработка со L'Atelier – Milano Film Network. Таа е посветена на долгометражни филмови и хибридни дела со препознатлив визуелен и уметнички пристап.
Во изданието за 2027 година се прифатливи проекти продуцирани или копродуцирани од италијански продуценти, како и проекти од земјите во фокус: Полска, Белгија, Луксембург и Холандија.
Избраните проекти ќе се натпреваруваат за Laser Film Award и M74 Award.
EAVE Slate
Во рамките на EAVE Slate ќе бидат избрани до осум европски продукциски компании за развој на портфолио на аудиовизуелни проекти.
Програмата комбинира групна работа, пленарни сесии и индивидуални консултации со фокус на стратешко планирање, процена на ризици и диверзификација на бизнисот.
Inspirational Labs
Inspirational Labs обединува повеќе иницијативи наменети за продуценти од целиот свет.
Фокусот е на развој на нови содржини и истражување на алтернативни бизнис-модели, со цел продуцентите да добијат нови знаења, контакти и можности за развој на своите проекти и компании.
Films x Games Connection Hub
По пилот-изданието, WEMW и SpielFabrique ја започнуваат втората едиција на Films x Games Connection Hub, програма која има за цел да ги поврзе филмската и индустријата на видеоигри.
Програмата е наменета за до 12 аудиовизуелни продуценти кои развиваат проект за видеоигра и сакаат да го продлабочат своето разбирање на секторот – од позиционирање и финансирање до дистрибуција.
Учесниците ќе имаат можност за групна работа и индивидуални консултации со меѓународни експерти, но и за директни средби со студија за развој на видеоигри од различни европски земји. Целта е да се идентификуваат можности за соработка и партнерства уште во фазата на развој на проектите.
Информативна сесија за заинтересираните кандидати
За сите кои размислуваат да аплицираат, WEMW организира онлајн информативна сесија на 6 октомври 2026 година
Регистрацијата за сесијата е задолжителна и е отворена до 5 октомври 2026 година.
Линк до регистрацијата: https://docs.google.com/forms/d/e/1FAIpQLSeB-yW20U7qZ80WOKixLxziTdcLcIK-yqg0BUUPpZaeDqV52g/viewform
Можности за македонските професионалци
Програмата When East Meets West претставува можност и за филмските професионалци и продукциските компании од Северна Македонија да ги претстават своите проекти пред меѓународни партнери и да воспостават контакти со продуценти, фондови, дистрибутери и други професионалци од европската индустрија.
Особено значајна е соработката со Агенцијата за филм на Северна Македонија, која е дел од мрежата на филмски фондови соработници на WEMW и преку која македонските професионалци можат да имаат пристап до посебни услови за учество во одредени програми.
За секоја од програмите важат различни критериуми за подобност, па заинтересираните кандидати треба да ги проверат условите пред поднесување на апликацијата.
Рокот за аплицирање за петте новоотворени програми е 30 октомври 2026 година.
Детални информации за повиците и за условите за учество можете да најдете на официјалната веб страница на WEMW: https://www.wemw.it/
WEMW 2027 го организира FVG Audiovisual Fund, во соработка со Trieste Film Festival и EAVE, други партнери меѓу кои програмата Креативна Европа МЕДИА.