Nga 13 deri më 16 maj 2026, në Novi Sad të Serbisë, u mbajt edicioni i dytë i Contemporary Dance Showcase në kuadër të platformës Moving Balkans, e cila mbështetet financiarisht nga programi “Evropa Kreative”. Ngjarja mblodhi autorë të produksioneve inovative të vallëzimit, talente të reja dhe profesionistë të shquar nga Ballkani dhe Evropa, duke krijuar kushte për promovim, shkëmbim profesional dhe rrjetëzim ndërkombëtar në fushën e vallëzimit bashkëkohor.
Programi përfshiu një përzgjedhje të produksioneve të vallëzimit bashkëkohor nga Ballkani, takime profesionale dhe prezantime që u zhvilluan në shtatë skena të ndryshme në qytet. Ndër 10 produksionet më të mira të përzgjedhura për vitin 2026 u rendit edhe shfaqja nga Maqedonia “Mocumentary”, me koreografi të Adrijana Dançevska Rovçanin, në produksion të Teatrit të Vallëzimit të Shkupit dhe qendrës kulturore “Interart”.
Me qëllim të nxitjes së një mbështetjeje afatgjatë, të koordinuar dhe transnacionale për vallëzimin bashkëkohor, u organizua sesioni panel “Moving Balkans: Vallëzimi bashkëkohor si hapësirë e përbashkët kulturore”, në të cilin morën pjesë hartues politikash, punonjës kulturorë dhe përfaqësues të institucioneve publike dhe ndërkombëtare kulturore. Në kuadër të diskutimit u prezantuan vlerësime mbi skenën bashkëkohore të vallëzimit dhe u theksua rëndësia e bashkëpunimit ndërsektorial dhe rajonal në krijimin e një produksioni artistik të qëndrueshëm, qarkullimit ndërkombëtar dhe zhvillimit profesional të artistëve dhe punonjësve kulturorë.
Në këtë ngjarje, përfshirë edhe sesionin panel, morën pjesë zyrat e programit Evropa Kreative të Republikës së Maqedonisë së Veriut dhe të Serbisë.
Fotografitë: Jovana Semiz
