До 1 септември 2026 година трае повикот за европски музички артисти кои сакаат да настапат на ESNS – Eurosonic Noorderslag, еден од најзначајните европски showcase фестивали и музички индустриски настани. Изданието за 2027 година ќе се одржи од 13 до 16 јануари 2027 во Гронинген, Холандија.
ESNS е место каде што новите европски музички имиња се претставуваат пред значаен број професионалци од музичката индустрија. Секоја година настанот привлекува повеќе од 4.000 професионалци, а неговата мрежа вклучува повеќе од 130 партнерски фестивали, медиумски партнери и европски музички export канцеларии.
Повикот е отворен за артисти од следните европски земји:
Албанија, Андора, Австрија, Белорусија, Белгија, Босна и Херцеговина, Бугарија, Хрватска, Кипар, Чешка, Данска, Естонија, Фарски Острови, Финска, Франција, Грузија, Германија, Грција, Гренланд, Унгарија, Исланд, Ирска, Италија, Косово, Латвија, Лихтенштајн, Литванија, Луксембург, Северна Македонија, Малта, Молдавија, Монако, Црна Гора, Холандија, Норвешка, Полска, Португалија, Романија, Сан Марино, Србија, Словачка, Словенија, Шпанија, Шведска, Швајцарија, Украина и Обединетото Кралство.
Артистите кои ќе бидат избрани за настап на ESNS автоматски се вклучуваат во European Talent Exchange – програма која им помага на европските артисти да добијат настапи на фестивали надвор од нивната матична земја.
European Talent Exchange е кофинансирана од Креативна Европа, а иницијативата ги поврзува европските артисти со широка мрежа на фестивали, музички export канцеларии и медиуми.
Преку оваа мрежа артистите можат да се претстават на фестивали како Sziget, Dour, Ypsigrock, Coachella, Colours of Ostrava, The Great Escape, MENT Ljubljana, Electric Castle, Primavera Sound и Best Kept Secret, меѓу многу други.
ESNS има импресивна историја во откривањето нови европски имиња. Многу артисти го одржале својот прв меѓународен настап во Гронинген или преку ESNS биле откриени од издавачки куќи, talent агенции или големи фестивали. Меѓу имињата кои се поврзуваат со ESNS се AURORA, Stromae, Christine and the Queens, Buraka Som Sistema, Fontaines D.C., Sigrid, Marina Satti & Fonés, Altin Gün, Priya Ragu, The Haunted Youth, The XX, Robyn, Tramhaus, Sam Smith, Hozier, Alyona Alyona, Viagra Boys, Zaho de Sagazan, freekind., Kaleo, Chalk, Fat Dog и многу други.
Покрај музичката програма, ESNS функционира и како значајна европска платформа за музичката индустрија, со конференции, панели, работилници и средби меѓу артисти, менаџери, агенти, фестивалски букинг агенти, издавачки куќи и други професионалци.
Во текот на оваа година ESNS најавува и нов отворен повик за ESNS Conference, преку кој ќе се прифаќаат предлози за панели, keynote предавања, работилници и други програмски формати.
Краен рок за поднесување на апликациите за ESNS 2027 е 1 септември 2026 година
Заинтересираните европски артисти сè уште имаат време да ја подготват и поднесат својата апликација преку следниов линк:
https://esns.nl/en/festival/play-at-esns/
Со оглед на тоа што ESNS е една од платформите преку кои европските артисти можат да се поврзат со фестивали и професионалци од цела Европа, повикот претставува значајна можност особено за артисти кои се подготвени за следниот чекор во својата меѓународна кариера.