Институтот „Ерих Помер“ (Erich Pommer Institut – EPI) го отвори пријавувањето за новите изданија на програмите Audiovisual Women и Series’ Women – меѓународни програми за професионален развој и лидерство, наменети за професионалци кои се идентификуваат како жени и работат во европскиот аудиовизуелен сектор.
Двете програми имаат цел да го поттикнат професионалниот развој на жените во европската аудиовизуелна индустрија преку унапредување на лидерските вештини, зголемување на видливоста и претприемачките капацитети. Воедно, тие се насочени кон справување со родовата нерамнотежа и недоволната застапеност на жените во индустријата.
Audiovisual Women | октомври 2026 – април 2027
Програмата Audiovisual Women е наменета за професионалци на средни и високи менаџерски позиции низ целиот аудиовизуелен ланец на вредности. Таа им обезбедува на учесничките стратешки алатки за успешно справување со промените, лидерство преку иновации и унапредување на нивната позиција во сè поконкурентна индустрија.
Програмата ќе се одржува од октомври 2026 до април 2027 година и комбинира работилници со физичко присуство и онлајн сесии, водени од меѓународни експерти. Дополнително, учесничките ќе имаат пристап до деловен коучинг и самостојно онлајн учење преку платформата eTraining.
EPI воспостави ново партнерство со Industry@Tallinn & Baltic Event, дел од Tallinn Black Nights Film Festival, каде што ќе се одржи една од работилниците, овозможувајќи им на учесничките пристап до широка меѓународна професионална мрежа.
Од своето основање во 2021 година, програмата Series’ Women се етаблира како значајна европска платформа за унапредување на видливоста и лидерството на жените и родово разновидните продуценти во секторот на телевизиските драмски серии.
Програмата ќе се реализира од ноември 2026 до март 2027 година, а учесничките ќе следат интензивна програма која вклучува работилници со физичко присуство и онлајн сесии, индивидуално менторство за кариера и обука за подготовка и презентација на проекти (pitch coaching).
Главните теми опфаќаат:
лидерство,
професионална видливост,
претприемништво,
правни аспекти,
маркетинг и стратегии за дистрибуција.
Директното поврзување со индустријата е еден од клучните елементи на програмата. Учесничките ќе присуствуваат на водечки европски настани, меѓу кои:
TV Drama Vision 2027 во Гетеборг;
Series Mania Forum 2027 во Лил;
што ќе им овозможи директна размена на искуства и контакти со професионалци и носители на одлуки од европската индустрија за телевизиски серии.
Програмата е финансирана од Креативна Европа – МЕДИА (Creative Europe MEDIA), а поддржана од: FOCAL, Screen Ireland, Göteborg Film Festival, Series Mania Forum, EAVE, European Women's Audiovisual Network (EWA), Seriesly Berlin, European Producers Club (EPC) и Women In Film & Television International (WIFTI).
Котизација
Редовната котизација за учество изнесува 2 500 евра и вклучува:
учество на сите работилници и коучинг сесии во текот на програмата;
сите потребни материјали;
пристап до избрани онлајн курсеви на EPI;
сместување и оброци за време на деновите кога се одржуваат работилниците со физичко присуство.
*Трошоците за патување не се вклучени.
ЕPI нуди и советодавна поддршка за обезбедување финансиски средства, со цел да им помогнеме на апликантите да учествуваат во програмата. За повеќе информации, обратете се на контактите наведени на веб-страницата:
https://www.epi.media/en_GB/audiovisual-women
Стипендии
Благодарејќи на финансирањето од програмата Креативна Европа – МЕДИА (Creative Europe – MEDIA), ограничен број на претежно делумни стипендии ќе бидат достапни за државјани на следниве земји:
Бугарија, Хрватска, Кипар, Чешка Република, Естонија, Грција, Унгарија, Латвија, Литванија, Луксембург, Малта, Полска, Португалија, Романија, Словачка и Словенија.
Учесниците од земји што не се дел од иницијативата (MEDIA) на Европската Унија сепак може да имаат право на стипендија, во зависност од нивното учество во рамките на потпрограмата МЕДИА, и тоа:
Албанија, Босна и Херцеговина, Грузија, Исланд, Лихтенштајн, Црна Гора, РС Македонија, Република Србија и Украина.
Покрај стипендиите, програмата нуди широк спектар попусти и можности за финансирање. Се препорачува во формуларот за апликација да наведете некоја од наведените стипендии или попусти или директно да се обратите на контактите наведени на следнава веб-страница:
https://www.epi.media/en_GB/audiovisual-women
КОЈ МОЖЕ ДА АПЛИЦИРА?
Целната група на програмата Audiovisual Women се жени менаџерки кои работат низ различни сегменти од синџирот на вредност во европската аудиовизуелна индустрија.
Најмалку 3 години работно искуство во аудиовизуелната индустрија.
Неколку примери на соодветни професионални профили се: менаџерки за продажба, продуцентки, уреднички за избор и нарачка на содржини (commissioning editors), правнички специјализирани за забавна индустрија, менаџерки на кина, раководителки за финансирање, менаџерки на филмски фестивали, фриленсери кои редовно работат со тимови на водечки позиции
ИНФОРМАТИВНИ СЕСИИ
Повеќе информации за содржината на програмата, нејзините придобивки, условите за аплицирање и техничките детали може да добиете на информативните онлајн сесии што ќе се одржат на 21 јули и 25 август 2026 година.
Линк до инфосесиите и до пријавите: