Autori maqedonas Ivan Shopov me romanin Zentrifuga është mes autorëve të nominuar për Çmimin e Bashkimit Evropian për Letërsi 2026. Në listën e ngushtë për këtë çmim prestigjioz, i cili përfaqëson një nga iniciativat kryesore në kuadër të programit Evropa Kreative (Creative Europe), janë përzgjedhur autorë perspektivë nga gjithsej 14 vende.
Të gjithë autorët që janë përfshirë në listën e ngushtë do të promovohen në nivel evropian me qëllim që të arrijnë një audiencë më të gjerë ndërkombëtare dhe të krijojnë kontakte me lexues përtej kufijve kombëtarë dhe gjuhësorë.
Fituesi i çmimit, si dhe autorët që do të marrin mirënjohje speciale, do të shpallen më 29 maj të këtij viti, gjatë ceremonisë solemne në Panairin e Librit në Varshavë.
Çmimi i Bashkimit Evropian për Letërsi jepet që nga viti 2009 dhe ka për qëllim të njohë dhe mbështesë autorët më të mirë evropianë në ngritje, si dhe të theksojë diversitetin gjuhësor dhe cilësinë e letërsisë bashkëkohore evropiane. Deri më tani, fitues maqedonas të këtij çmimi kanë qenë: Goce Smilevski me veprën Motra e Sigmund Freud (2010), Lidija Dimkovska me Jeta rezervë (2013), Nenad Joldeski me Secili me liqenin e vet (2016) dhe Petar Andonovski me Frika nga barbarët (2020).
Më shumë informacione për këtë nismë mund të gjeni në këtë link.