По објавувањето на повикот за поднесување предлог-проекти, со рок за аплицирање до 15 јануари 2026 година, избран е нов конзорциум што ќе ја спроведува следната фаза од програмата Изведбена Европа (Perform Europe) – иницијатива на Европската Унија која поддржува одржливи и инклузивни модели на гостувања и дистрибуција во областа на изведувачките уметности.
Надоврзувајќи се на успесите од првите две фази, Изведбена Европа (Perform Europe III ) во текот на следните две години ќе поддржи најмалку 25 уметнички проекти преку систем на каскадни грантови. За спроведување на програмата се обезбедени 2 милиона евра од потпрограмата Култура на програмата Креативна Европа.
Избраните проекти ќе добијат финансиска поддршка, ќе има можност за стручно усовршување и размена на знаења, при што посебно внимание ќе се посвети на развојот на поодржливи модели на меѓународна соработка, намалување на влијанието врз животната средина, обезбедување праведни работни услови и вклучување разновидна публика. Поддржаните проекти ќе бидат претставени и промовирани преку дигитална платформа, која истовремено ќе служи како простор за вмрежување и поврзување на професионалците од секторот.
Програмата ќе ја спроведува конзорциум составен од следните организации: IETM – International Network for Contemporary Performing Arts, European Festivals Association (EFA), Circostrada, European Dance Development Network (EDN), Pearle* – Live Performance Europe и IDEA Consult.
Избраниот конзорциум обединува широк спектар организации од европскиот сектор на изведувачките уметности, вклучувајќи уметници, културни работници, организации и институции со различна големина, со цел зацврстување на меѓународната соработка и подобрување на достапноста на изведувачките уметности низ Европа.
Повеќе информации за Изведбена Европа (Perform Europe III) може да најдете на следниов линк:
https://culture.ec.europa.eu/whats-new/news/here-is-the-third-edition-of-perform-europe