Në kushtet e ndryshimeve të shpejta në hapësirën digjitale mediatike, Komisioni Evropian po bën përpjekje të vazhdueshme për përmirësimin e edukimit mediatik të qytetarëve, duke mbështetur bashkëpunimin mes vendeve evropiane dhe kufizimin e ndikimit të dëmshëm të dezinformimit.
Thirrja aktuale është publikuar në kuadër të Nënprogramit Ndërsektorial të “Evropa Kreative” me një buxhet total prej 3.000.000 euro. Mbështetja maksimale për projekt është 500.000 euro, ndërsa norma e bashkëfinancimit nga Bashkimi Evropian është 70% e kostove të pranueshme të projektit. Prandaj, aplikantët duhet të bashkëfinancojnë projektet e tyre edhe nga burime të tjera.
Qëllimi dhe prioritetet:
Qëllimi i kësaj thirrjeje është të mbështesë projekte dhe praktika inovative ndërkufitare për edukim mediatik në mbarë Evropën, të drejtuara ndaj grupeve të ndryshme shoqërore dhe të fokusuara në përballimin e sfidave të peizazhit digjital mediatik që ndryshon vazhdimisht.
Mbështetja është e destinuar për projekte bashkëpunuese me objektiva të qarta për përmirësimin e edukimit mediatik, të cilat do të fokusohen në prioritetet e mëposhtme:
• Sigurimi i zgjidhjeve që u mundësojnë qytetarëve të zhvillojnë një qëndrim kritik ndaj mediave, të njohin dhe të reagojnë në mënyrë të përshtatshme ndaj dezinformimeve, teknikave të manipulimit me informacione dhe sfidave të tjera në mjedisin mediatik online;
• Përmirësimi dhe shpërndarja e praktikave të mira për edukim mediatik që marrin parasysh ekosistemin mediatik të ndryshueshëm, i tejkalojnë kufijtë kulturorë, kombëtarë ose gjuhësorë dhe e forcojnë bashkëpunimin mes rajoneve të ndryshme evropiane. Qasjet inovative mund të përfshijnë ide të reja ose origjinale, metoda, mjete ose mënyra të zbatimit, pa marrë parasysh nëse janë online apo offline;
• Përdorimi i edukimit mediatik si mjet për përfshirjen e qytetarëve, pjesëmarrjen e tyre aktive në proceset shoqërore dhe rezistencën ndaj manipulimeve dhe ndikimeve negative mbi proceset demokratike.
Rezultatet e pritura
• Krijimi ose zgjerimi i bashkëpunimeve ndërkufitare në projekte që zbatojnë praktika të mira përtej kufijve kombëtarë, kulturorë dhe gjuhësorë;
• Zhvillimi dhe zbatimi i mjeteve dhe iniciativave për edukim mediatik, duke marrë parasysh nevojat e grupeve të caktuara të synuara – përfshirë, por jo të kufizuara vetëm në grupet me aftësi të kufizuara mediatike ose me qasje të kufizuar në media;
• Mbështetja e profesionistëve nga fusha e edukimit mediatik për përshtatjen e punës së tyre ndaj zhvillimit të shpejtë të formateve mediatike dhe zakoneve të ndryshueshme të qytetarëve në konsumimin e përmbajtjeve mediatike.
Aktivitete të kualifikuara
Në kuadër të kësaj thirrjeje do të financohen aktivitetet e mëposhtme:
• Krijimi dhe/ose shpërndarja e materialeve shumëgjuhëshe dhe/ose multikulturore, përfshirë përmbajtje interaktive për përmirësimin e aftësive digjitale të qytetarëve, kuptimin e tyre të peizazhit mediatik dhe rezistencën e tyre ndaj dezinformimeve dhe përpjekjeve për manipulim me informacione. • Zhvillimi i mjeteve për edukim mediatik dhe materialeve të tjera për qytetarë, trajnerë, krijues përmbajtjesh dhe media, të drejtuara ndaj të gjithëve ose ndaj grupeve të caktuara shoqërore dhe të moshës.
• Zhvillimi i zgjidhjeve inovative për edukim mediatik të përshtatura për peizazhin mediatik aktual dhe të ardhshëm (projekti mund të përfshijë prototipe, por nuk duhet të jetë ekskluzivisht i fokusuar në zhvillimin e IT-së).
• Organizimi i trajnimeve për qytetarë, edukatorë dhe krijues përmbajtjesh, përfshirë shkëmbimin e praktikave të mira përtej kufijve gjuhësorë, kombëtarë dhe kulturorë.
• Organizimi i ngjarjeve publike dhe/ose punëtorive për ngritjen e vetëdijes dhe shpërndarjen e praktikave të mira.
• Aktivitetet e organizuara nga komunitetet lokale me qëllim përshtatjen dhe përmirësimin e qasjes në mjetet dhe materialet e tjera për edukim mediatik.
Aplikantë të kualifikuar:
Aplikantë të kualifikuar për këtë thirrje janë konsorciume të përbëra nga të paktën 3 subjekte juridike nga minimum 3 vende pjesëmarrëse në Programin Evropa Kreative. Konsorciumet mund të përfshijnë:
o organizata fitimprurëse dhe jofitimprurëse (private ose publike);
o autoritete publike (kombëtare, rajonale, lokale);
o organizata ndërkombëtare;
o universitete dhe institucione arsimore;
o organizata mediatike;
o institucione kërkimore dhe teknologjike;
o shërbime për teknologji.
Kohëzgjatja e projekteve: deri në 24 muaj
Mënyra e përgatitjes dhe dorëzimit të projekt-propozimeve/aplikimit • Projekt-propozimet përgatiten në përputhje me kriteret dhe kushtet e përcaktuara në dokumentin e thirrjes: NEWS – Media Literacy (CREA-CROSS-2026-MEDIALITERACY), Version 1.0, 21 October 2025. Thirrjen dhe dokumentin e thirrjes mund t’i gjeni këtu.
• Aplikimet përpunohen dhe dorëzohen elektronikisht përmes Funding & Tenders Opportunity Portal (F&TP). Informacione për qasjen në F&TP mund të gjeni këtu.
Më shumë informacione për thirrjen mund të merrni në sesionin online të organizuar nga Komisioni Evropian, i cili do të mbahet më 3 dhjetor 2025 nga ora 10:00 – 12:00.
Për pjesëmarrje në sesionin online përdorni lidhjen e mëposhtme.