Европската комисија објави нов повик во рамките на иницијативата „Изведбена Европа (Perform Europe)“, кој ќе поддржи организација или конзорциум од организации што ќе бидат одговорни за развивање и управување со следната фаза на Perform Europe – европска платформа осмислена за да ги направи прекуграничната турнеја и дигиталната дистрибуција на дела од изведувачките уметности поодржливи, поинклузивни и поиновативни.
Вкупниот буџет на повикот изнесува 2 милиона евра, од кои најмалку 70 % се наменети за каскадни грантови што поддржуваат проекти во изведувачките уметности, и тоа: театар, танц, перформанс, циркус и кукларство.
Цел
Надоврзувајќи се на постигнувањата од првите две фази, оваа нова фаза на „Изведбена Европа (Perform Europe)“ има цел да тестира и да промовира нови модели на турнеи во земјите учеснички во програмата „Креативна Европа“ кои:
• го намалуваат негативното влијание врз животната средина;
• ги зајакнуваат правичните работни услови;
• промовираат инклузивни продукции;
• го подобруваат пристапот до разновидна публика и разновидни заедници.
Активности
Повикот е отворен за организации или конзорциуми од организации со докажана експертиза во изведувачките уметности и прекуграничната соработка. Избраниот корисник ќе треба:
• да ja дизајнира и да управува со дигиталната платформа „Perform Europe (2026 – 2028)“;
• да организира отворени повици за финансирање проекти за турнеја и дистрибуција преку каскадни грантови;
• да обезбеди активности за јакнење на капацитетите, менторство и размена на знаења;
• да ги одржува и да ги надградува дигиталната инфраструктура и алатката за поврзување (matchmaking);
• да развие активности за допирање до публика, брендирање и комуникација;
• да собира, да анализира и да шири податоци и да придонесува за развој на политики во секторот на изведувачките уметности.
Приоритети
Сите активности во рамките на „Изведбена Европа (Perform Europe)“ треба да придонесат за:
• правична и одржлива прекугранична мобилност;
• инклузија, разновидност и родова еднаквост;
• зелена и дигитална транзиција во изведувачките уметности;
• имплементација на подобри работни услови и правичен надомест за уметниците и културните професионалци;
• еднаков пристап на помладите генерации до можности за дистрибуција;
• поддршка за украинските уметници и културни оператори.
Времетраење: Грантот покрива период од 24 месеци (2026 – 2028).
Квалификувани апликанти
На повикот може да се јават правни лица активни во секторот на изведувачките уметности и основани во земјите учеснички во програмата „Креативна Европа“.
Апликациите може да ги поднесе:
• една организација;
• конзорциум составен од најмалку три организации од три различни квалификувани земји.
Начин на подготовка и поднесување на предлог-проектите/апликацијата
• Предлог-проектите се подготвуваат во согласност со критериумите и условите наведени во документот за повикот: (CREA-CULT-2026-PERFORM-EU), Version 1.0, 30 October 2025. Повикот и документот на повикот можете да ги најдете тука.
• Апликациите се обработуваат и се поднесуваат електронски преку Funding &Tenders Opportunity Portal (F&TP). Информации за пристапување до F&TP може да најдете тука.
Повеќе информации за акцијата „Изведбена Европа (Perform Europe)“ може да најдете тука.